(Ռատիօ Վատիկան) Ուրբաթ` 18 դեկտեմբեր 2015-ին, Առաքելական Պալատի Ռետեմթորիս Մաթեր անուամբ մատրան մէջ տեղի ունեցաւ Յիսուսի Սուրբ Ծննդեան տօնին առ ի պատրաստութիւն` Յիսնակացի շրջանի երրորդ եւ վերջին խորհրդածութեան նիստը զոր ներկայացուց Քահանայապետական Տան Քարոզիչը` Քափուչին միաբանութեան անդամ, Հայր Ռանիերօ Քանթալամեսսան։
2015 տարուայ Յիսնակացի քարոզներու ընդհանուր նիւթ հանդիսացաւ ''Քրիստոս Ժողովուրդներու լոյս'' նիւթը որ հիմնուած է Վատիկանեան Տիեզերական Բ Ժողովի '' Lumen gentium - Ժողովուրդներու Լոյս'' սահմանադրական վաւերաթուղթի վրայ։
Հայր Քանթալամեսսան`այսօրուայ իր խորհրդածութիւնը կեդրոնացուց` ''Ժողովուրդներու Լոյս'' վաւերաթուղթի ութերորդ գլխուն մէջ պարունակուած Սուրբ Կոյս Մարիամի վարդապետութեան վրայ` ''Քրիստոսի եւ Եկեղեցւոյ խորհուրդին մէջ` Անարատ Սուրբ Կոյս Մարիամը'' վերտառութեամբ։
Հայր Քանթալամեսսան այս տարուայ իր խորհրդածութիւններու ընդմէջէն ուզեց բացայայտել Վատիկանեան տիեզերական վաւերաթուղթի մեզի փոխանցելիք պատգամը այսօր` մեր հաւատքի կառուցման գծով։
Իր այսօրուայ երկարաշունչ խորհրդածութեան աւարտին Հայր Քանթալամեսսան ակնարկեց նաեւ Աստուածամօր` որպէս Մայր եւ Դուստր Աստուծոյ Ողորմութեան ապա խօսքը եզրափակեց բոլոր ներկաներուն մաղթելով` Շնորհաւոր Սուրբ Ծնունդ։
All the contents on this site are copyrighted ©. |